تحدث السيناريست أحمد عاطف، مؤلف مسلسل كارثة طبيعية، عن فكرة العمل، والتي لا يصدق الجمهور أنها حقيقية حتى الآن، مشيرا إلى أن فكرة كارثة طبيعية موجودة من قبل طرح مسلسل بالطو، وبدأ في روي تفاصيل العمل.

مؤلف مسلسل كارثة طبيعة يكشف كواليس تحضيره للعمل

وقال أحمد عاطف، مؤلف مسلسل كارثة طبيعية، في منشور رصده موقع تحيا مصر على حسابه الرسمي بموقع التواصل الاجتماعي فيسبوك: ناس كتير بتسألنى فكرة مسلسل "كارثة طبيعية" جت في دماغك ازاى وإمتى وناس تانية مستغربين الفكرة أو فاكرينها فانتازيا !، هي الفكرة دى كانت عندى من قبل ما أكتب مسلسل بالطو أصلا  ... وجاتلى الفكرة لما شوفت خبر بالصدفة على إحدى الصحف الالكترونية  عن ولادة سيدة شابة لخمس توائم في إحدى المحافظات ... ولفت نظرى الصورة اللى محطوطة في الخبر للأب والأم وهما شايلين الأطفال.

 وتابع مؤلف كارثة طبيعية: حسيت وش الأب والأم في الصورة كأنه معجز جداً مع إنهم شباب .. مفيش فرحة على وشهم، تقريبا نفس وش محمد سلام في نهاية الحلقة التالتة وهو شايل الأطفال و مصدوم.

مؤلف مسلسل كارثة طبيعية: الحالات دي كانت موجودة في الحقيقة. استغربت أن الناس مش حاسة بيهم 

واضاف مؤلف مسلسل كارثة طبيعية: استغربت كمان لما لقيت الكومنتات على الخبر ده كلها ناس مبهورة من العدد وعمالين يهزروا ويقولو فى الكومنتات ايفيهات زى ايفيهات موظف السجل المدنى فى المسلسل ، ومفيش أى حد حتى دعا للأب والام ربنا يقويهم على الأقل ... لأ ده فيه ناس كانت كاتبة في الكومنتات حاولوا تعملولهم حجاب عشان مايتحسدوش ... اللى هو كمان الناس هتحسدهم.. فحسيت إن الناس مش حاسة خالص بيهم  أو بالمشاكل اللى هتقابلهم بسبب العدد الكبير ده من الأطفال اللى اتفاجئوا بيه مرة واحدة .

وأضاف: من هنا الفكرة نورت في دماغى ... بدأت أعمل سيرش عن الموضوع أكتر لقيت التوائم المتعددة دى " حالة نادرة بس بتحصل كتير " .... تقريبا في كل محافظة في مصر فيه محمد وشروق ... ومحدش فينا حاسس بيهم ولا بوجودهم ولا بالمشاكل اللى بيمروا بيها.

مؤلف مسلسل كارثة طبيعية: فيه محمد وشروق في كل حتة

واختتم مؤلف مسلسل كارثة طبيعية حديثه: فيه محمد وشروق في الغربية ... ومحمد وشروق في بنى سويف وكفر الشيخ و البحر الأحمر وكل المحافظات ... فمبسوط جداً ان الناس بدأت تحس بمحمد وشروق في المسلسل ومتعاطفين معاهم وأتمنى كل الناس يتعاطفو بردو مع الحالات اللى زيهم في الحقيقة ... ومش شرط الحالات اللى زيهم يكونوا ناس خلفوا خمسة ولا سبعة أو ناس خلفوا أصلاً ... لا ممكن محمد وشروق يكونوا مرضى أو منكوبين أو حصلهم مشكلة كبيرة خارجة عن إرادتهم شقلبت حياتهم و ضغطتهم و محتاجين مساعدة وإهتمام مننا كمجتمع ... ولو مش هنساعدهم على الأقل نحس بيهم.