باسم يوسف عن لقاء بيرس مورجان: ضربة جزاء في نهائي كأس العالم

ظهر الإعلامي باسم يوسف، في ثاني حلقاته المسجلة ببرنامج "كلمة أخيرة" المذاع عبر قناة ON، مع الإعلامي أحمد سالم، موضحًا كواليس حواره مع الإعلامي بيرس مورجان.

باسم يوسف يكشف تفاصيل لقائه مع بيرس مورجان

قال باسم يوسف: “كنت حاسس إني داخل أشوط ضربة جزاء في نهائي كأس العالم، ولو ضيعت الاستاد كله هينزل يعمل اللي فيه النصيب، واتحطيت في حتة إني ممثل القضية الفلسطينية، وأنا مكنتش كده ولا حاجة”.

وتابع باسم يوسف: “في العشر أيام دول، منمتش، وعزلت نفسي عن أهلي تماما، وفضلت أذاكر، وأخذت كورس في 70 سنة من الصراع، وبقيت أقول لنفسي إيه المصيبة اللي حطيت نفسي فيها دي”.

وأضاف باسم يوسف: “هما لما بيعملوا فيلم عن الهولوكوست، بيغرقوك في قصص ومشاعر ورمزيات، فأنا عملت كده على نطاق صغير، وجبت معايا زعتر وزيت زيتون في اللقاء، وقولت لبيرس مورجان، أنا جايبلك زعتر وزيت من فلسطين أهو وبالشفا، وشرحتله شجر الزيتون اللي عمره 600 سنة، وهو بياكل كده كنت بطفحه معلومة”.

وأردف باسم يوسف: “الحوار الأول انتشر بين الناس عشان النكت والكام كلمة مصري اللي قولتهم، لكن الحوار التاني انتشر أكتر في الدواير الأجنبية، أكتر من الدواير العربية، لأنهم لأول مرة يسمعوا معلومات عن دولة طول عمرهم بيتقالهم إن دي صديقتنا وحليفتنا”.

وأشار باسم يوسف إلى أن: “لما تم الإعلان عن اللقاء التاني مع بيرس مورجان، الناس قالت آه ده الجزء التاني من المطحنة، وجابوا فيشار وقعدوا يتفرجوا، بس تاني مرة أنا مكنتش عاوز أعمل كده، وفي الأسبوعين اللي بعد 7 أكتوبر، أنا لاقيت نفسي بتكلم مع أكاديميين وسياسيين، ولاقيت نفسي ناس وصلتني مع أعضاء عرب جوة الكنيست الإسرائيلي”.