أحمد موسى: «مش عايزين نواب جاية بالفلوس والرشاوى»

وجه الإعلامي أحمد موسى الشكر إلى وزارة الداخلية على جهودها في التصدي لجميع التجاوزات خلال اليوم الأول من انتخابات مجلس النواب 2025، متسائلًا عن دور الهيئة الوطنية للانتخابات في متابعة الدوائر التي شهدت مخالفات، وهل سيتم إلغاء الانتخابات في هذه الدوائر إذا ثبت وجود تجاوزات.

تجاوزات الانتخابات ودور الهيئة الوطنية للانتخابات

قال موسى، خلال تقديمه برنامج "على مسئوليتي" عبر قناة صدى البلد:"بعد انتهاء الانتخابات البرلمانية الحالية، لازم نعرف العوار اللي في الانتخابات ونحله، طبيعي مفيش حاجة كاملة، ولكن هل نظام الفردي دا المفيد؟ بالمناسبة الفردي مفيد جدًا، ونظام القائمة مفيد، والقائمة والفردي معًا مفيد، البرلمان دا مزيج من الاتنين، وهنشوف هل هيكون مفيد ولا لا".

وأضاف موسى أن هناك نوابًا في البرلمان قد لا يعرفون شيئًا عن دوائرهم، مؤكدًا:"لما يكون في مشكلة في الدائرة بتاعتهم ويكلموهم مش هيعرف حاجة، دا في محافظة كاملة فيها دائرتين فقط، دا كان زمان المحافظة دي فيها 6 دوائر، مفيش مرشح مهما كانت قوته هيقدر يلف على 7 مراكز، أحيانًا يلعب المال السياسي والعائلي دورًا."

ضرورة تعديل النظام الانتخابي ومتابعة الدوائر

أشار موسى إلى سلبيات النظام الانتخابي الحالي، قائلًا:"بقولها على بلاطة، مفيش انتخابات مفيش فيها مشاكل، مفيش انتخابات مفهاش فلوس، ولكن بنسب مختلفة، لازم نعدل النظام دا، علشان يكون المرشح ممثل عن دائرته وعارف كل حاجة عنها."

وتابع:"هناك أكثر من 200 دعوى أمام القضاء طعنًا على الانتخابات البرلمانية، لازم نشوف كل دائرة فيها مشكلة ونعيد فرز الانتخابات مرة ثانية، لازم نعرف حق ربنا فين، إحنا عاوزين نائب يكون متواجد في كل وقت، وليس وقت الانتخابات."

كما أكد موسى أن الدولة تقدم خدمات كبيرة، مشيرًا إلى أن دور النائب الخدمي قد يقل بعض الشيء نتيجة ذلك، لكنه لا يمنعه من أداء مهامه الأساسية تجاه المواطنين ومتطلباتهم اليومية.