عرضت الإعلامية شريهان أبو الحسن قصة من طراز مختلف وغير تقليدية لرجل يشتكي من قلة رومانسية زوجته، خاصة وأن الاعتقاد السائد هو أن "الرومانسية احتكار نسائي، الرجالة ما تعرفهوش ولا سمعوا عنه"، قائلة: "دايمًا بنسمع الستات هي اللي بتشتكي من قلة الرومانسية في العلاقة، ومن قلة الاهتمام أو الكلام الحلو، والرجالة تشتكي إن الستات عايزة رومانسية زيادة". 

وأضافت الإعلامية شريهان أبو الحسن خلال تقديمها برنامج "ست ستات" المذاع عبر قناة dmc، أنه بحسب رسالة الزوج، فهو يبلغ من العمر 37 عامًا، متزوج منذ 8 سنوات ولديه أولاد،  ويلخص فيها معاناته، قائلًا: "حياتي من بره ممكن تبان طبيعية، بس أنا تعبان ومش سعيد في حياتي، ومش دي الحياة اللي حلمت بيها أو تخيلتها، كنت فاكر إن الجواز هو بداية حياة فيها الحب والحنان والاهتمام، وقلت إني لما أتجوز هعيش القصة اللي بحلم بيها، وأحس إن ليا حضن أرجعله، لكن اللي حصل غير كده خالص، فزوجته شخصية مختلفة تمامًا، شخصية جد جدًا ومش رومانسية خالص"،  معقبًا:" هذا الجانب لم يكن واضحًا خلال فترة الخطوبة، وكنت أفسر ذلك إنه كسوف أو خجل". 

وتابع الزوج في رسالته: " اكتشفت إن مفيش اهتمام بعد الجواز، مفيش حنية، مفيش طبطبة، عايشين كأننا في مهمة رسمية، حاولت معاها بكل الطرق وفتحت المواضيع، وطلبت منها نبقى قريبين من بعض، بس في كل مرة بحس إنها مش فاهمة أنا بتكلم عن إيه! حاولت إني أبدأ بنفسي وأقولها بحبك ووحشتيني وأجيب لها هدايا وأنا راجع، لكن هي ما اتغيرتش"، معربًا عن شعوره بالوحدة والحرمان قائلًا: "بقيت حاسس إني متجوز ومش متجوز، موجود في البيت كأني ضيف. مفيش حوار، مفيش مشاركة، مفيش دعم وقت التعب، عايز حد يسألني مالك بعد يوم طويل في الشغل، عايز حضن أرجع له يحسسني إن الدنيا لسه بخير. عايز أسمع كلمة بحبك، وحشتني، مالك".
وأردف:"  أنا عايز مراتي هي اللي تكمل معايا حياتي، ومقدرش أطلقها لأني مقدرش أبعد عن ولادي ولا هسمح إنهم يتربوا بعيد عني"، مؤكدًا أنه لا يفكر في الزواج مرة أخرى أو الطلاق حفاظًا على أولاده، لتعقب الإعلامية شريهان أبو الحسن على الرسالة، قائلة: "بتروح فين الرومانسية بعد الجواز؟ وهل بتنتهي تمامًا ولا شكلها بيتغير ولا ممكن إنعاشها؟".