أكد أحمد السيد، نجم النادي الأهلي السابق، أن بطولة الدوري المصري بدأت بشكل قوي، مشيرًا إلى أن المنافسة هذا الموسم ستكون بين الأهلي وبيراميدز، مع إمكانية ظهور منافسين آخرين.

وقال أحمد السيد، في تصريحات عبر برنامج «نمبر وان» الذي يقدمه الإعلامي محمد شبانة، ويذاع على قناة CBC: «زمان عشان نقول على مدرب كويس كان لازم يكون عنده 60 سنة، لكن الدوري بدأ سخن والمدربين حاليًا شباب».

وأضاف: «الأهلي عنده ثبات انفعالي وشخصية في الرجوع وتحقيق الفوز، وطول عمري من أيام مانويل جوزيه، الأهلي معروف إن اللي بيلعب هو اللي يستمر، مفيش نجم كبير، وطول عمر الأهلي معروف بالعدل.. الفريق هو العدل».

وتابع: «فريق الشرقية إنبي فريق قوي، وضيع الموسم اللي فات نقاط كتير من الأهلي والزمالك، ومفيش عندهم رهبة، عندهم لاعيبة كويسة، وفرقة أولاد صغيرين ومدرب كويس ويقدر يقرأ الخصم، ومصطفى الجزار عمل مباراة كويسة».

وعن دفاع الأهلي، قال: «أنا مفتقد ياسر إبراهيم، ومينفعش تعتمد على شخص واحد، قبل الجونين كنت ماسك الكورة كويس جدًا».

وأشاد بزيزو، قائلًا: «زيزو لاعب كويس جدًا، أنت بتاخد منه 70% منه، ومع إمام وزيزو هتاخد حاجة كويسة لما تدخلهم جوا مع بعض».

وعن أفشة، أوضح: «أفشة مضغوط عليه جامد، وبلاش نحصر لاعب في مباراة أو مباراتين. مينفعش جمهور الأهلي يهاجم أفشة، المفروض تدعم أفشة لأنه مقيد عندك، وبعد الموسم ابقى هاجم أي لاعب».

وأشاد بن شرقي، قائلًا: «بن شرقي من أعظم اللاعبين اللي شفتهم في حياتي، على طول هادي ومنشغل بنفسه، زي أبو تريكة، ومش بيتعصب خالص».

وعن أكرم توفيق، قال: «أكرم لما يجهز هيبقى له دور كبير».

وأضاف عن منصف: «منصف لاعب كويس، ولازم يلعب جماعي كويس، هو عايز يعمل كل حاجة، وأنت بتلعب جوه منظومة ولازم تتشارك مع باقي زملائك».

وتحدث عن وائل جمعة، قائلًا: «كابتن وائل جمعة خبرة كويس، ولما المجموعة الكبيرة تجتمع على لاعب يبقى كويس».

وعن الزمالك، قال: «الزمالك هيعاني جدًا».

وأكد أن الأهلي يمتلك شخصية قوية، قائلًا: «أداء الأهلي كان مهزوز، والناس كانت واثقة إنك هتكسب لأن عندك حلول برا».

وتابع: «المنافسة هتبقى بين الأهلي وبيراميدز، ومحمود صلاح وأحمد رضا لو الناس دي كانت موجودة هتفرق».

وشدد على ضرورة التعامل الجيد مع ضغط المباريات، قائلًا: «في ضغط مباريات جامد، لازم تريح باقي اللاعبين».

وعن بيراميدز، قال: «بيراميدز فريق كويس، بس منحكمش من أول مباراة، لازم تقيس فريق قوي ولاعيبة كويسة».

وأكد أن دعم الجماهير عنصر أساسي للنجاح، قائلًا: «النجاح محتاج جمهور كبير يساند».

وعن رضا سليم، قال: «رضا سليم لازم يلتزم بالتمرين ويلعب، وبلاش يضغط على النادي».

وعن أشرف داري، أضاف: «أشرف لاعب كويس وممكن يبقى له دور كبير جدًا، مشكلته في الإصابات الكتير».

واختتم أحمد السيد تصريحاته بالحديث عن خيارات الدفاع: «اختار ياسر والجزار يلعبوا في المكان ده، ومينفعش تلعب اتنين جدد في المكان».