أكد طارق يحيى، نجم الزمالك، أن الجهاز الفني للفريق بقيادة معتمد جمال يحتاج إلى الدعم، مشيرًا إلى أن الظروف الحالية لا تسمح بالحكم على المدرب بشكل قاطع.
وقال يحيى، في تصريحات عبر برنامج «نمبر وان» الذي يقدمه الإعلامي محمد شبانة، ويذاع على قناة CBC: «لو فيه خلاف مع المدير، تقعد 70 يوم في مناقشات فاضية ووقت ضاع على الفاضي، كان لابد من اجتماع بعد الفوز بالدوري بأسبوع، أنت أصلًا معندكش قيد واتأخرت في فترة الإعداد، وإحنا كمسؤولين بنساهم في مشاكل النادي».
وأضاف: «شوفنا أيام سودة مع جون إدوارد، واللي عمله الزمالك ولمّ اللاعيبة كابتن معتمد ونجح معاه، ليه بتدور على مدرب أجنبي؟».
وتابع: «أداء الزمالك في المباراة السابقة كان متوقع، ولقب الدوري الموسم الماضي يُحسب لمعتمد جمال».
وأوضح: «اللاعيبة لعبت بالمخزون البدني اللي موجود، ومع الوقت هتلاقي الإصابات كتير، لأن مكنش فيه فترة إعداد».
وقال: «أنا مشفتش كده، معتمد كتر خيره، أنت لو جبت مين مش هيعرف يعمل حاجة في الوقت القصير، وفي لاعيبة لسه مجتش، وبانزا جاي من الطيارة على الملعب، والزمالك أصلًا مجاش».
وشدد يحيى على ضرورة العمل البدني، قائلًا: «الحل لازم معتمد يشتغل بدني، والمحلل البدني يشتغل جامد جدًا، والسوشيال بتضغط جامد، بس جمهور الزمالك واعي».
وأضاف: «الجمهور هو السبب إن الزمالك ياخد الدوري، وربنا يعدي الفترة دي على خير، عشان البدني واقع واللاعيبة معندهاش بدني».
وطالب جماهير الزمالك بمساندة الجهاز الفني، قائلًا: «لازم نساند معتمد، ومعتمد شال الزمالك، واللاعيبة اللي لعبت شالوا الزمالك، ولاده وناسه ونجومه».
وعن قطاع الناشئين، قال: «قطاع الناشئين لو اتصرف ربع اللي بيتصرف على الأندية التانية هنطلع لاعيبة كويسة».
واختتم تصريحاته قائلًا: «اصرفوا على قطاع الناشئين، هتوفروا كتير أوي».
0 تعليق