كريم نيدفيد عن قرار رمضان صبحي الانتقال لبيراميدز : اتضايقت جداً ورفضت أرد على رسالته الوداعيه

تحدث كريم نيدفيد، لاعب النادي الأهلي السابق وسيراميكا كليوباترا الحالي، عن طبيعة علاقته بزميليه السابقين رمضان صبحي وناصر ماهر، وذلك خلال ظهوره في بودكاست “فنجان شاي” مع الإعلامي أحمد أسامة، ويستعرض تحيا مصر التفاصيل. 

كريم نيدفيد: علاقتي برمضان صبحي دلوقتي عادية 

وقال نيدفيد:“العلاقة بيني وبين رمضان أو ناصر مش موضوع كبير، يعني مافيش تواصل على التليفون أو حاجة، لكن لما بنتقابل بنسلم على بعض ونتكلم ونتطمن، وخلاص العلاقة مش صداقة قوية، لكن برضه مافيش كره، العلاقة عادية جدًا.”

وأضاف:“كنت أنا ورمضان مع بعض في كل المنتخبات؛ الناشئين والشباب والأولمبي، فكانت علاقتي بيه أقوى شوية من ناصر بعد احتراف رمضان العلاقة قلت، لكن طول ما في تعامل بتكون العلاقة كويسة، ولما التعامل بيقل مافيش علاقة، وده طبيعي بس مافيش أي مشكلة بينا".

وتابع نيدفيد حديثه عن انتقال رمضان صبحي إلى بيراميدز قائلًا:“موضوع بيراميدز كان قرار هو شايفه صح من وجهة نظره، وهو اللي يتحمل نتيجته. شايف العرض مناسب ليه، وده حقه في النهاية".

كريم نيدفيد: رمضان صبحي كان واخد مكانة كبيرة وهو صغير 

وأردف:“رمضان جوه الأهلي كان الناس بتحترمه جدًا وبتقدره، وكان واخد مكانة كبيرة وهو صغير، فقرار رحيله ماكانش سهل علينا إحنا ولاد النادي. القرار ممكن يبقى عادي لأي لاعب، لكن بالنسبة لينا إحنا اللي اتربينا في الأهلي، ماكانش منطقي، خصوصًا في السن والتوقيت ده". 

وأضاف نيدفيد:“ما اتكلمتش مع حد وقتها، بس كنت متضايق. لما بيراميدز أعلن رسميًا انتقال رمضان، كتب رسالة وداع على جروبنا في الواتس آب، وأنا ماقدرتش أرد، لأن الموقف كان صعب عليّ ومؤثر جدًا. الأهلي كان مقدّره جدًا، وكان بيعمله كل حاجة ممكن تتعمل، فحسّيت إن القرار ده صعب علينا كلنا. رمضان وقتها كان أغلى إعارة، فالموضوع كان كبير". 

واختتم نيدفيد تصريحاته قائلًا:“قابلت رمضان مؤخرًا في النادي، وسلمنا على بعض عادي جدًا، مافيش أي حاجة. كل واحد دلوقتي في طريقه، وربنا يوفق الجميع".