شحتة كاريكا عن دقدق: "كان طيب وبيعمل خير كتير"

تحدث المطرب الشعبي شحتة كاريكا عن صديقه الراحل أحمد دقدق، الذي رحل عن عالمنا اليوم بعد صراع مع سرطان المخ، كاشفًا عن وصية مؤثرة أوصاه بها قبل وفاته، خلال مداخلة هاتفية ببرنامج "كلمة أخيرة" على قناة ON مع الإعلامي أحمد سالم، وقال: "دقدق كان محترم جدًا وجميل وخير وغلبان، وكان بيعمل خير كتير، بقاله سنة بالظبط مريض، وعمره 30 سنة، وكان من أحسن الناس اللي قابلتها في حياتي، كان طيب وبيساعد الناس، وربنا أنعم عليه وخفف عليه في الدنيا علشان يلاقاه في الآخرة".

تصريحات شحتة كاريكا

وكشف شحتة كاريكا عن وصية للراحل دقدق، موضحًا: "من فترة قال نفسي أبطل وأفتح أي مشروع، وقال لي لو مت امسحوا أغانيا، بصراحة قال لي كده ودي أمانة قدام ربنا".

وأضاف: "الحزن جوانا مش بالأغاني، والواحد في الدنيا بيفرح الناس وإحنا واقفين مع بلدنا، وهو كان بيحب البلد، وعمرنا ما قلنا حاجة سيئة ولا أغاني سيئة، وأغانينا كلها فرح".

كما أكد شحتة كاريكا أنه هو الآخر أوصى بحذف أغانيه بعد وفاته، قائلًا: "اللي ربنا كاتبه ليا هشوفه، والحياة مش مضمونة، ولما تموت هتموت لوحدك وهتحاسب لوحدك، وكل واحد ربنا أنعم عليه بالنجومية يتحاسب عليها، وأنا قايلهم كل حاجة ليا تتشال بعد وفاتي".

ومن جانبه، أوضح خال أحمد دقدق أن الراحل كان متزوجًا وله طفلان يبلغان من العمر أربع سنوات وثلاث سنوات، مؤكدًا أن الأسرة ستنفذ وصيته بحذف أغانيه احترامًا لرغبته الأخيرة.