يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربى للنص الجديد"، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.

بقايا الروح لـ إبراهيم أبو سمرة 

.........
الدنيا ماشية بيا للمنتهى
يا ربنا
أنا عقدي ليه إنتهى!
و8 ايادي بيرفعوني لفوق
حاسس بكل الناس وعايز افوق
شايف صحابي بيصرخوا بدموع
يا عيال أنا كويس ومش موجوع
مرتاح من الحقنة وم المحاليل
مرتاح كما مركب في حضن النيل
والليل دموعي في الدعا والذكر
أنا عقدي ليه إنتهى!
وعندك أنت السر
2
ما تعيطوش القمر
والدمع منه ينشرخ له بُطين
والدمع مجرى الدم جوه العين
شايفك يا ابويا في أحسن الأحوال
بتشد إيدي تجرني لبره
والسرة متوصلة بالأرض والعيلة
والضحكة طالعة بخيلة
والصراخ فياض
3
ليه القماش أبيض بيشغي بدم
عيب ع الزمان ولا الزمن معيوب
ولا بقيت نقطة وباب ودروب
فيه  دبيب وصوت قرآن
سامع نغم عمران بيجود الرحمن
سامع صحابي وأخويا بيدعوا بالرحمة
سامع وشايف كل شيء واضح
مع إن نظرى ضعيف من أول أمبارح
إزاي شايفكم كدا
وإزاي سامع بوضوح
يا رب وبرحمتك
أنا جسم ولاَّ أنا روح
4
ليه انتوا بتعيطوا ؟
أو مين في بيتنا مات؟
إزاي بطير في السما
إيدي بقت جناحات
وصوابعي صبحت ريش
يمكن حشيش السهرة كان مضروب
بس انا فوق.. في السما وشايف الغروب
5
يا ربنا يارحيم
أنا إنس ولاَّ أنا طير
ولا دا حلم طويل
من خيبتي في التفكير

إبراهيم أبو سمرة

• مواليد محافظة السويس، جمهورية مصر العربية.
• المؤهل الدراسي: بكالوريوس التجارة – جامعة السويس.
• حصل في مجال الشعر على:
جائزة الدولة التشجيعية في الآداب لعام 2025.
المركز الثالث بمسابقة "د. جابر عصفور" – المجلس الأعلى للثقافة 2024
المركز الثاني بمسابقة إقليم القناة وسيناء الثقافي 2018
المركز الثالث بمسابقة "بيرم التونسي" للعامية – اتحاد كتاب مصر 2017
المركز الخامس بمسابقة وزارة الشباب والرياضة 2014 .
• في مجال التأليف المسرحي (مسرح الطفل)
المركز الأول عن مسرحية "سميرة موسى" للأطفال (بوزارة الشباب والرياضة)
المركز الأول عن مسرحية "3×1" للأطفال. (بوزارة الشباب والرياضة)
المركز الثالث عن مسرحية "ثورة" للأطفال. (بوزارة الشباب والرياضة)