يستعد بيت الشعر العربي، بإدارة الشاعر سامح محجوب، لإطلاق الدورة الثانية من "ملتقى بيت الشعر العربى للنص الجديد"، وذلك خلال يومى 2 و3 مايو، فى إطار استكمال التجربة التى حققت حضورًا لافتًا فى المشهد الثقافى خلال دورتها الأولى.

سيرة المجاذيب.. لـ إسلام حمادة

لو يفوت الموت أخف
زي الريح
زي الضيا
زي السكوت الحميد
ونشوف في قبضة الروح البساطة
ينتهي الخوف الرمادي
والضعف
ننتبه للحدث
لزحمة العيشة
ولقمة صعبة المنال
للعيال في انفلاتها
وثورة بتستوي في العيال
مانخترعش المعجزة
ع الريق
نبتلى بالإيمان والذنب
بسيرة الأنبيا
والأتباع
والمعارضة فنشيل حكاوي الآخرة للآخرة
ونرقص مع الدنيا
ماتتخضوش
حنرقص والإيقاع ع المهل
حنسيب ضمير الرسل
للرسل
ونغني في الموت الجماعي
بعياط جماعي
يرتبك الشعور؛
نتجن
نشتبك باللحظة في سكونها
أيا ما كان مضمونها
مش حنخاف
مفيش شعور في الجنون
مفيش سيادة بتتفرض ع الزهد
دلوقتي أنسب وقت للصرخة
للخروج ع العادي
والمألوف
سنوا الصليب في الشوارع
وادّعوا المعجزة
دلوقتي دوركم في المحاولة
في تاريخ
ضروري يدنسوه
ويفصلولكم حكاية
تبرز شرفهم/ مجدهم
في قتل الفتنة/ إخمادها
دلوقتي دوركم في الدفاع
فحاربوهم
ع الألفة
والشورى
شرف النبوة
ونفحة الوحي الإلهي
ع الضمير الحي
والخوف م اللي جاي
على نجدة الملهوف
وسيرة المجاذيب
تحاربوهم

.......

إسلام حمادة

شاعر عامية مصري صدر له أربع دواوين شعرية
-ربع ساعة نهار
-بيورثوا المأساة ببساطة
-زي اللي متقال في الشوارع -أسامي