وصف الفنان التشكيلي، الدكتور أشرف رضا، أستاذ الفنون الجميلة بجامعة حلوان، حفل افتتاح المتحف المصري الكبير، بأنه: “افتتاح مبهر ينافس العروض العالمية”.
د. أشرف رضا: حفل افتتاح المتحف المصري الكبير ينافس العروض العالمية
وقال “رضا” في منشور له عبر حسابه الشخصي بموقع التواصل الاجتماعي، “فيسبوك”: “افتتاح مبهر.. وأخيرًا، مصر افتتحت أكبر متحف فى العالم، حلم السنين، وجهد ناس كتير، وشغل وشقى آلاف المصريين فى افتتاح مبهر جدًا، حضره رئيس الجمهورية، وضيوفه من 79 دولة”.
وأضاف “رضا” عن حفل افتتاح المتحف المصري الكبير: “تفاصيل كتير وزخم استعراضى فى زمن محدد - ساعتين فقط - وبالرغم من كده، كم تنوع متداخل فى العروض ينافس العروض العالمية”.
وأضاف: “أعجبنى جدًا الإضاءة، والمؤثرات الضوئية، وأنظمة الليزر والدرونز وغيرها، وأعجبني كمان الملابس والإكسسوارات والإستعراضات وحركة المسرح... خصوصًا مع خلفية الأهرامات العظيمة، ومبنى المتحف بمعماره المميز والفريد، والموقع العبقرى اللى اتبنى فيه المسرح، وأعجبنى أكتر فكرة دمج الحكاية مع العرض التسجيلى للمقتنيات والآثار على الشاشة، بالرغم إنى كنت متوقع أشوف جولة أكبر من المتحف من جوة... وخصوصًا قاعة "توت عنخ أمون" الجديدة".
أشرف رضا: موكب المومياوات مناسبة مختلفة عن افتتاح المتحف المصري الكبير
وتابع: “أصدقاء كتير قارنوا بين حفل افتتاح المتحف المصري الكبير، وبين احتفالية نقل المومياوات... ماننساش إن دى كانت مناسبة مختلفة تمامًا عن إفتتاح المتحف، وكانت عبارة عن مواكب متعددة، ومسارات فى الشوارع، وملوك كتير رايحة متحف الحضارة اللى كان مفتوح بالفعل من قبل كده"
واستكمل: “ناس كتير ماتقبلتش الموسيقى الكلاسيكية، والعروض الموسيقية الأوبرالية.. وكانت تتمنى موسيقى أقرب لثقافتنا المحلية... لكن دى كانت مناسبة جدًا لضيوف الافتتاح الأجانب، اللى كان واضح انبهارهم بيها.. وعلى فكرة، كان جميل قوى ربط الحضارة المصرية القديمة بباقى الحضارات المختلفة اللى عدت على مصر”.
واختتم: "علشان كده... مصر أم الدنيا...كل التحية لكل المشاركين فى إعداد الاحتفالية العالمية دى، وكل العاملين فى "المتحدة"، والمنتج "محمد السعدى"... وتحية خاصة لصاحب فكرة إنشاء المتحف، الفنان القدير "فاروق حسنى" وفريق الأثار، وفريق عمل المتحف المصرى الكبير".
0 تعليق