محمد عبد المنعم بعد أول تدريب: دخلت فى اكتئاب وبشكر كل اللى دعمنى

نشر محمد عبد المنعم، مدافع المنتخب الوطني المحترف في صفوف نيس الفرنسي، رسالة عبر حسابه الرسمي على موقع الصور إنستجرام بعد مشاركته فى أول تمرين له عقب شفائه من الإصابة بالرباط الصليبي التي تعرض لها في الموسم الماضي.

رسالة عبد المنعم

وكتب عبد المنعم: الحمد لله دائماً وأبدا انهارده أول يوم تمرين ليا بعد فتره هي الأصعب في حياتي دخلتني في اكتئاب وتوتر من المستقبل، خلتني أشوف مستقبلي بشكل مختلف عن اللي كنت بحلم بيه بس التفكير هنا طول الوقت مش هسيب حلمي وإني أقدر أعدي أي مرحلة صعبة حسيت بكمية الحب والتعاطف والدعم معايا لما حصلت الإصابة وده اتأثرت به نفسيا بس في نفس الوقت خلاني أحس بالمسئولية اتجاهم، كنت بشتغل وهدفي قدام عيني وإن هرجع تاني وأكون عند حسن ظنهم، ومن هنا حسيت إن كل حاجة أنا وصلتلها مكنش شطارة منى ده كانت ترتيبات ربنا ليا قربت منه أكتر حسيت بالرضا وحسيت إن ربنا بيقولي متقلقش أنا جنبك ومش هسيبك فارتحت، وهنا التفكير اتغير لما حسيت بالرضا، والنجاح مهم جداً بس الأهم منه هو علاقتك مع ربنا، ومن أهم النعم الناس اللي بتحبك بصدق واللي وجودهم في حياتك بيخليك إنسان أحسن.

وأضاف محمد عبد المنعم: اتعلمت أن أكون حامد من غير شروط أسعى واشتغل واتعب بس في نفس الوقت أحافظ على كنوزي الحقيقية أهلي وأصحابي والقلوب اللي بتقف جنبك في كل لحظة، لأن دول اللي بيفضلوا يوم ما تتعب أو تمرض أو حتة ترحل واللي بيفضل فعلا هو الذكرى والدعوة الحلوة واللحظة اللي بتبقى أثر في قلب كل واحد، لأن الاستثمار الحقيقي هو الاستثمار في الذكريات بيخلي اللحظات تعيش فوق عمر الإنسان، شكرا من قلبي لكل واحد افتكرني وبعت كلمة أو دعا لي وجودكم حواليا بيكبر المعني ويطول عمر اللحظات الحلوة شكرا على دعمكم.