كشف رجل الأعمال ياسين منصور، المرشح على منصب نائب رئيس النادي الأهلي، عن الأسباب الحقيقية وراء عودته للعمل الإداري في النادي الأهلي في هذا التوقيت تحديدًا، مؤكدًا أن القرار لم يكن سهلًا، وجاء بعد فترة طويلة من التفكير ومراجعة الأوضاع الشخصية والمهنية، ويستعرض تحيا مصر التفاصيل .
ياسين منصور: عودتي للأهلي بسبب ابتعادي عن ضغط العمل في شغلي الخاص
وقال منصور في تصريحاته:"العودة للعمل الإداري في الأهلي حاليًا؟ القرار ليه كذا سبب أولاً، على المستوى الشخصي، الفترة اللي فاتت كانت صعبة جدًا عليا بسبب ضغط الشغل، كنت محتاج أركز تمامًا في شغلي، ومكنش ينفع أبدأ تجربة إدارية كبيرة زي دي وأنا مش فاضي لها تمامًا".
وأضاف:"منصب نائب رئيس الأهلي مش منصب شرفي، ده دور بيتطلب وقت كبير وتركيز ومجهود دلوقتي الحمد لله الأمور اختلفت، بقى عندي فريق إدارة قوي وواثق فيه، وكمان ابني الكبير انضم لشغلي، فده خلاني أقدر أفرغ وقت حقيقي لخدمة النادي اللي بحبه".
وأكد ياسين منصور أن توقيت العودة جاء بعد اقتناع داخلي بأنه قادر فعليًا على تقديم إضافة للنادي، وقال:"أنا مؤمن إن خدمة الأهلي شرف ومسؤولية، ومش ممكن أخوضها إلا وأنا جاهز 100% دلوقتي حاسس إن ده الوقت المناسب، من كل الجوانب، الشخصية والمهنية وحتى العائلية".
وتابع:"أنا مش داخل علشان منصب أو ظهور، أنا داخل علشان أشتغل بجد وأساهم بخبرتي في دعم كيان كبير زي الأهلي".
ياسين منصور يشيد بمنظومة الأهلي
وقال ياسين منصور:"الأهلي علامة تجارية قوية ومرعبة في الشرق الأوسط.. نادي مؤسسات، له شعبية ممتدة مش بس في مصر، لكن في كل الوطن العربي وإفريقيا".
وأضاف:"بصراحة، شايف إن الأهلي مابقاش مكانه الطبيعي في إفريقيا بس.. الأهلي يستحق يكون في دوري أبطال أوروبا أو بطولات الاتحاد الأوروبي، لأنه بينافس بمقاييس عالمية".
وأشار إلى أن النادي يمتلك البنية التحتية، والإدارة، والقوة التسويقية التي تجعله مؤهلاً للوجود ضمن الكيانات الكبرى في عالم كرة القدم، سواء من حيث الأداء أو التنظيم، موضحًا أن فكر الإدارة الحالية بقيادة الكابتن محمود الخطيب يسير في هذا الاتجاه.
0 تعليق